Taasisi ya Volunteers In Development (VID) imefanya matembezi ya hisani

kwa ajili ya kuchangia mahitaji ya shule kwa watoto yatima wa majumbani

zaidi ya 850 tarehe 5 Disemba 2021.

Akizungumza katika hafla hiyo Waziri wa Nishati na Madini Mhe.Januari

Makamba amesema jamii inapaswa kushiriki katika matukio mbalimbali

yanayolenga kuleta maendeleo kwa watu wenye uhitaji ili kuondokana na

changamoto zinazoweza kuvunja amani.

“Nawasihi kuendelea kuombea nchi yetu iwe na amani na utulivu na

kudumisha moyo wa utoaji kwa wenye uhitaji, kwani tutaondoa matabaka kwa

kuwafanya wasio nacho wasione wametengwa na mwisho wa siku wakaingia

katika vitendo viovu” amesema.

Amesema kupitia matembezi hayo wataweza kuwafikia watoto kupata

mahitaji yao kwani kuna umuhimu mkubwa wa kupata haki ya elimu.

Kwa upande wake Mwenyekiti wa VID Tune Shaabani amesema elimu ni

kipaumbele kikubwa cha VID ili kuleta maendeleo na mabadiliko chanya kwa

jamii.

“Kila ifikapo mwisho wa mwaka huwa tunafanya zoezi la harambee kuwapatia

mahitaji ya shule kama kalamu, madaftari, sare za shule, mabegi na mahitaji

yote. Elimu ni kipaumbele kikubwa kwetu kama tunavyojua kuwa elimu ni

bure Tanzania ila kuna gharama mbalimbali za kuendesha elimu hiyo”

amesema.

Amesema jamii ikishikana kumuendeleza mtoto yatima kielimu itakuwa

msaada mkubwa kuleta maendeleo na mabadiliko makubwa katika taifa,

kwani atakuwa na nafasi nzuri ya kuisaidia familia yake na jamii yake kwa

kupambana dhidi ya umasikini na ujinga.

Taasisi ya VID ni taasisi ya kinamama ambayo imedhamiria kuleta mabadiliko

chanya katika jamii kwa kuelekeza nguvu kuwasaidia watoto yatima wa

majumbani, wajane na wasiojiweza ambapo katika zoezi la matembezi ya

hisani yalilenga kuwafikia watoto zaidi ya 865 katika mahitaji ya elimu.